مستقل چیئر مین پی سی بی لگانے کا معاملہ، آصف زرداری اور نواز شریف اپنے اپنے موقف پر ڈٹ گئے

پاکستان کرکٹ بورڈ کے مستقل چیئرمین کے معاملے پر حکمران اتحاد کی دو بڑی جماعتیں مسلم لیگ ن اور پیپلز پارٹی آمنے سامنے آگئی ہیں ۔ ’جیو نیوز‘ کے مطابق مسلم لیگ ن کے قائد اور سابق وزیر اعظم نواز شریف ،نجم سیٹھی اور پیپلز پارٹی کے شریک چیئر مین آصف علی زرداری ، ذکاء اشرف کو پاکستان کرکٹ بورڈ (پی سی بی ) کا چیئر مین لگانے کے خواہاں ہیں اور اپنے اپنے موقف پر اڑ گئے ہیں۔

مسلم لیگ ن کا موقف ہے کہ نجم سیٹھی بہتری انداز میں کرکٹ بورڈ کے معاملات چلا رہے ہیں اس لیے انہیں ہی مستقل چیئرمین ہونا چاہیئے۔ دوسری جانب پاکستان پیپلز پارٹی کا موقف ہے کہ چونکہ وزارت بین الصوبائی امور ان کے پاس ہے اور کھیلوں سے متعلق تمام معاملات دیکھنا اسی وزارت کا کام ہے اس لیے چیئر مین پی سی بی لگانے کا اختیار بھی انہیں کے پاس ہونا چاہیئے۔

ذرائع کے مطابق وزیر اعظم شہباز شریف چاہتے ہیں کہ یہ معاملہ خوش اسلوبی سے حل ہوجائے۔ چند روز قبل نجم سیٹھی نے وزیر اعظم اور وفاقی وزراء سے ملاقات بھی کی تھی جس کے بعد یہ خبر سامنے آئی تھی کہ وزیر اعظم نے ان کا نام پی سی بی کی سربراہی کے لیے نامزد کرلیا ہے۔